2018-жылдын 25-декабрь күнү Кыргыз Республикасынын Жогорку Кеӊешинин депутаты Каныбек Иманалиев «Роза Отунбаеванын демилгеси» эл аралык коомлук фонду Кыргыз Республикасынын Жогорку Кеңеши менен биргеликте уюштурган «Балдарга жаңы жылга белек- Акылдуу китеп» акциясынын алкагында Бишкек шаарындагы №5 Улуттук компьютердик гимназия мектебинде балдарга китеп окуп берди.

Эл өкүлү окуган «Ынтымак сыры» китебин аталган мектептин окуучулары өтө кунт коюп, зор кызыгуу менен угушту. Жолугушуу учурунда балдар менен эл өкүлүнүн китеп жана китеп окуу тууралуу ой бөлүшкөн баарлашуусу да болду.

Белгилей кетсек, Кыргызстанда жашаган ар түркүн улуттун турмуш тиричилигин, маданиятын чагылдырган «Ынтымак сыры» китебинин автору белгилүү педагог Догдуркүл Кендирбаева. Китеп «Роза Отунбаеванын демилгеси» Эл аралык Коомдук фонду тарабынан жарык көргөн. Китептин негизги идеясы балдарды экологиялык, улуттук конфиликттерди болтурбоого чакыруу, алардагы жаратылышты коргоо, ынтымакты бекемдөө көндүмдөрүн калыптандыруу.

Аталган демилгенин максаты – коомчулуктун көңүлүн окуу маданиятын алга жылдырууга буруу, балдардын сөз байлыгын, ой жүгүртүүсүн калыптандырууда китептин баалуулугун көрсөтүү, китеп окуу муктаждыгын жаратуу жана компьютердик көз карандылыктан алаксытуу.

К.Иманалиев кезектеги китеп окуу эстафетасын КР Жогорку Кенешинин депутаты Садык Шерге тапшырды.